კვირა, 22.10.2017, 11:03
Мой сайт
 
[ ახალი შეტყობინებები · მონაწილეები · ფორუმის წესები · ძებნა · RSS ]
გვერდი 1 დან1
ფორუმი » Test category » მეგრელების ფორუმი » მარგალურ პოეზია
მარგალურ პოეზია
ბუბუთარიღი: შაბათი, 12.09.2009, 15:35 | შეტყობინება # 1
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
თენგიზ ფეტელავა

*გეიშანათი!
სი რექუ ჩქიმი ოდაბადე დო ნახაფული ყათე ცაში
ოსხეთიში ტიბუ ფერეფიში ეკნამუნათი გეგმოორთი აში
დარჩიჩიებუ დღახუეფი ოხვამედო ცხოდიში მესი
მიქუ მუჩესუ ჩქი ბჟა კოლხიში ზღვასუ ენაქვერსი.
კინოხ მემიჩქუ გილეთხინდი სქანი სქუაში შური დო გურცუ
ვაგოურკა თინძალასუ დო დიდშა მურცუ!
სახიოლოს დო ნაბორიუს კინოხონც ლურცუ.
გეკოქვაჩი გოძვაძვილი სქანი ფაფარი
ჯვეშიქუ მიდართუ ნოსისმარი, ვითომც ღუმა,
ცას ქუდეფითუ ევოფშანთუ, სით გახიოლე
გუმანგი თოლი სქუარენდო არძო ართირე;
გეიშანათი!
გეიშანათი, გურიში გაბლა კორკონტია.
სქანი ორინესუ არძო დართუ ღორონთია,
ქიდარჩქალ, შქირენული სქანი სქუა
ქირქეში დუცუ მერინელი აშო მიკირთინ, ჭუა!..

*ჯიმაგე!
მა, დობღრიდა ვადოფულა დუდი დიყვილუშო,
სქანიდა მემჩამუ სითელა დო ჩქიმი რთინა,
მა ვამმაჯინ, ნჭყოლირი გურც მუჟამს ბაქიდუქუ,
მუჟამს ეთმიდორთუ ნახაფულიში გორჯოგელი ჩონგურიში ბირა!
თი შური, ნამუთი სქანდა მემჩამუ, უღურალაში ნოცეცხალირე,
ნამუთი გოტყვაცი შქირენალაში გიმოულასი.
კოჩანობაშო მიორღვი სითუ ხე დო ბირგული დო,
ფინთილი ცაში კარკანტი ქიგნმოოდირთუნი!..

*კინოხონიში ყუდე
მა გეგმოობჩი ჩქიმი ჯვეში ყუდე,
თისი ვარკალიში ცოდას ენოობყუნდე,
ვაგაურზი სიჭიჭარაში ტირტინცუ
საწიმოთი ვამათვინე მითინც!
მა გამვოსქიდი ანდა წანერი ყუდეს
ნუძუ ჯალეფიში შური ენართუდესუ
თიში გორგოთისუ გინარჯგინუ რაქვალქუ
მიდამიღუ საწიმოხუნო ჯაქალქუ.
მირაგადუ აბა თეში იბშიო
შურიშია შური ვეშებშიო
მუკი ყვან ვეშვაშვალუ ჩხვერი
მუშენირე რინა ოშინერი?!
დო გოფაბჩუნქი ჩქიმი არზეფიში თანგალს
ბაღანობა შარას გილეხანგალც
თურმე ნოყელც ნაფეფინა პირი
მუში ოროსუ გითოღურუ კინი.
ასე მონჯარუ ჯვეშეფიში ჯერღვი
უსისხირექუ გილაბრთი, გილებყერყი:
მა გეგმობჩი ჩქიმი ჯვეშეფიში ყუდე
თიში ვარკალიში ცოდას ენოობყუნდუ!...

*ქომხუტოლე ართშა!
შხვაშო ეფუნქუ თხოლო
ჩქიმ გურც გიომარჩხა
ქომხუტოლე ართიშა
ხოლო ! ხოლო ! ხოლო !
ცა დო დიხაში ფოლო
თოლემც მეთხოზ ღოლო
უსქანებას ორო
ირკოც ბჭკომუნა დოლო.
ვორექ სქანი მართვე
ფსუა ქომუჩი მარდირე
მეტო მორდული სქანიცა
ეშე ვეიჭვართე!
შხვაშო ეფუნქუ თხოლო
ჩქიმი გურც გიომარჩხა
ქომიხუტოლე ართიშა
ხოლო ! ხოლო ! ხოლო !

*ფანდური
ვო, ფანდურ–ფანდური
სქან ტანი ნამ ტყას ჩანდუნი,
მახოხია ჯაშქვიდუ
კისერც გითოფშანდუნი.
ვო, ფანდური–ფანდური
სქან ტან ნამ ტყას ჩანდუნი.
ნამ ბორიეფ გიქინძუანდუ
კამას ეკკოღნდუნი!
ეჰეჰეი ფანდური,
ტყა ხომ ქორთხილანდუნი
ამდღა ჩქიმი ხე გითქოხვახვუ
ჯაშქვიტუში მანგური!
სქან გოლუაფირო ფანდური
გიყორც ხინტურ–ხანტური
საქორთუოს ქიგნაქუნი
სქან ჭუეფიში შქართუნი!..

 
ბუბუთარიღი: შაბათი, 12.09.2009, 15:36 | შეტყობინება # 2
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
მურმან წოწორია

* * *
სოიშახ
სიზმარს ვორწყექ მარგალურო,
სოიშახ
ჩქიმი და დო ჯიმაშ შური მანთხანს,
სოიშახ
ჯოღორეფშორო დოვძიძგონუნთ
ართმაჟიას.
ვამიწყინა
სქან ნინაშა ლექსი ვჭარენ,
ვამიძალა
დიდაშ ნინაშ გოჭყოლადა,
ვაგომძიცა
ეგებ ვორდე გვალო ხანგა,
ვამაცალა
სქან ჯინჯიშე მოჭყოლადა.

*ჩქიმ ცხოვრება ათაშიე
საქორთუოშ ისტორიას
სამარგალოშ ვგორუნქ ჯინჯეფს,
ღორონთუმე გამაშერენს
მითაჟამიშ სიმახინჯე.
მუქ აღოლეს ვაგმაგინუ
ჩქიმ წინაპრემს, თე ჩქინ ჯინჯემს,
ჩქინ ნაჭარა წიგნეფიშე
გეიშალასეს, გეიშაგრინჯეს.
ამდღა ხოლო სამარგალოს
ბრელი გითმუტახუნს ბიჯგემ,
ხოჯიშორო გილვოგაგანთ
გილავღორანთ, ვგორუნთ მინჯეს.
ჩქიმ ცხოვრება ათაშიე
დიო შარა გიძუ გინძე,
თე ქიანაშ დიდა ვარდას
მა ვორექ დუდიშ მინჯე.
ვქეიფენქ დო ლერსის ვწარუნქ
ჯიმა ორდას ვამწანს ღიჟე,
კოჩი რექ დო, სი ქუგალე
ჩქიმი გური იერინჯე.

* * *
შურობუმუ გინვორთინეთ
შურუბუმუ ქიანათ,
ჭიე–ჭიეთ მევოდინეთ
ქიონი დო დიარათ.
ორთაშ დორთაშ თოისერი
მემორჩქუნა დიარათ,
თეშენ მითინს ვემიორჩქუ
სამარგალო ქიანათ.

* * *
მარგალ ვორექ, მანგარ ვორექ...
ცაშა მემიჭოფუ სუა
აიეტიშ ჯიშიშ ვორექ
საქორთუოშ ხვითო სქუა.
არამხუტუშ მოთა ვორექ,
ამირანიშ ძიძესქუა.

* * *
კათცხაბშორო მევკორობუნქ
ჩქიმ ქიანაშ მითაჟამს,
მუმა ჩქიმი თუთა რე დო
დიდა ჩქიმი ორე ბჟა.
ხვიჩა–ხვიჩა მურიცხეფი
ორე ჩქიმი ჯიმა–და
უკახალე ჯინა მიორს
ვამიორს კინორთა.
პიტა–პიტათ მომილებუ
ოხვამეფ, ჟინოთა
ლექსით მოკო დინაფილი
მითაჟამიში მიკორთ.

 
ბუბუთარიღი: შაბათი, 12.09.2009, 15:38 | შეტყობინება # 3
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ლუდუკი ძანძავა

* * *
ჩქიმი ყუდეში მარჭიხოლი
შხვა ქიანაშა ვაფურინა
ჩილამურით ვემიფშა თოლი
ვამომიწამალუა რინა
გელუქი ოდაში აბარწაშა,
ქიმიობირე, ქიმიოწკაფი,
დღას ვაფთირუა შხვაშა,
ჩქიმი გურხანტურელი ძღაბი.
სქანი ყოროფათ ხეში შკა გური,
ჩილამურით მაფუ ეფშა,
ზესქვი ვორექ ვართ მალაღური,
ვარი ვაფთირუა შხვეფიშა.
გოფინი, გოფაჩი სქუალეფი,
ქიმოძირი ბჟაში სინათლე
გევორჩქინათ სქუალეფი
ყოროფა ხანდა დო სიმართლე.
* * *
სერი მიყორს თუთარჩელა
მურიცხეფით ხანტურელი
ცხიმურიში ჯინს ტაბაკი კველა
ყებურს ქოთომი შამფურელი.
ორკოლს ღვინი ოჯალეში
სქვერი მინდორო გოტებული,
ლუღი ნაწილა ოჭმარეში,
ბაჯარს დაჩხირი მონტებული.
სქვამი ცირაში ხეთ ნაქარგა,
პაჭიჭი ცქვამას მორგებული,
ვარყა ახალი ნახენდი ხანგა,
შულადირო მოთებული.
ნაპოში მორჩქილა ჩონგურით,
აკაკიში წიმოწყაფილი ობირაშე
ძუკუში სარანჯი თოფურით
ზინთხი ეშაყუნაფილი ოქუმ წყარშე.
მარულე დო შაყარუა
ძღაბიში გინოძირაფა,
ჯაში ჯინს ხოჯიში ტყაბარუა
შვებას ეთო ბირაფა.
დიარას კუჩხიში გერინელო
კოჩანიერი რაგადი
ჭიშკარს ცხენით მერინელო
ღართი კაბა დო ნაბადით,
ათენერი მიყორს, ათენერი მწანს,
ღორონთიშ რსხებულო

* * *
ალილოიდა, ალილოიდა,
მოქუჩუჩელი სქანი ოდა
გოკურცხი მენძელი ვაგგოჭყორდა
ქისეში მახარებელი ვორდა.
ქისეში მოულას მიგახვამა
გოწოს ვარდი ეში მასქვამა
ყუდე ელი მოლი ელნახვამა
თოფური შანქარიში მაჰამა.
ორდალი სქვამი ბაღანეფი,
ტან დო კუჩხის ახალეფი
ჩხოულეფი ღეჯეფი მახალეფი,
გოფსირედანი ძაღარეფი.
მარან ეშა ხვარიელი
სინჯა ჭკვერი ტარიელი
ოდა საბზადი განიერ
ორდალი ჯამთელი ხანიერი.

* * *
ათათია, ბათათია
დემეფს დუდი მებკვათათია,
ყილოს ქიგებდოხოდათია დო
შქა ტყას გეკიბკათათია.,
თექი მითი დობხვადუნა
აშო გეგნოფაფრთხათია,
ეთეში თინა ქორხვადუნა
გური მაფუ მოულირი ამდღათია.

 
ბუბუთარიღი: შაბათი, 12.09.2009, 15:39 | შეტყობინება # 4
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
.ივეტა წითაშვილი
***
დამორჩილიშ ბუძოლიას
არყებენა ბერწულეფ,
მელე-მოლე ქურღვაფუნა
მუნეფიში მაყარეფ.
ტანს კაბა ქუგოხარცქუნა
ჭითათ ელაძარწუფელ,
ბერწულეფიშ ელაჯინათ
პიჯ გუნჯამნა ჭუბურეფს.
წყარი ღალსი ქელაყუნდუ,
მუშ ოლაგეს ვენტირედ,
ავარცხილს ახვარჩალუდუ
გურშა ველაცადინელ.
ბორია-ჭარკანტ ნაჩილათუს
იკილოთუდ ოხვამეს,
ჩილამურით ოშკვიდუანდ
ცოდას ელადაჩხირელს.
ცასი კარი გოუნჯამუ
ჭარკანტიში მოჯინეს,
გეცუმენა ზესკვეფ ჟიშე,
ართო ქიგორგოთუდეს.
თოლეფ გეწკურილ გაფუნო
გური ენოდარაზელ,
დამორჩილის ბუძოლიას
მუჭო გარძი უჩქიმეთ.
ვეშერყიპ ბერწულეფიშ
არყებული მაყარეფს,
წყარი ღალს ვაიძირუნო,
ოლაგეს ვადონტირელ
ჭარკანტიში ნაკილოთა,
ელნანგარა ოხვამეს,
ვარა ცას ვამკოიდგუდუო,
ჩარდახ ეკოჩარდახელ,
ზესკვეფს ვაუთქუალნანო,
გურშა ვენოცადინელ.
მა თეშ რაგად ვამოსკვანსი,
მა თეშ რაგად ვამშინერს,
მარა ოკო ქოიწუე
ჭკუა იშენ ქექე რე
ჩქიმ ოსხუნურ სი ვაგაში,
სკანი ხიოლ მა ვორექ,
სი ჩქიმ გურიშ მურიცხ რექ დო
მათ ვადმარნე უსკანეთ!
***
ჩენჯას ეშე ეზგუმონჭილს
ეწაფაფუ ნოყელეფ,
მეახალუ გურიშ ჭუაქ,
ნარღებაშე წაურთ ფერქ.
ავრე დაჩხირ ეთაგვარგვაზ,
ევრე წყარმალ მიორე,
ჩილათირ დღალეფს ეკანგარს,
უფაფუანს ნოყელეფს.
გოხოლუას მითინს ვარწყე
ელმარინეს, მოხვარეს,
არძო მუშის იწკუმონტუ,
არძო მუშის უჯინე.
ელაფარკალ ჭველა ჭველას,
იფინდიხნა ჭანდარეფ,
ღირთანს ჭარკანტ აკვარჩხილი,
ქიანას ნწყუნს სოდგარენ.
თაში ყოფე, ჭარაშ წისქვილ
მუშის მექუნს დღაშ დო სერს,
ქუმწუფართხაფ ჩენჯას ჭუა,
მუსვანჯუაფ ნოყელეფ,
გუნწყუმ გურს სკვილ, კვარკვაზელ დო
თეზმა ხანიშ ნანარღეფ,
ჩენჯა ჩენჯას ქუგოლუაფ
კარკაცანდეს ნოყელეფ.

***
ცას მუნაფა ელასხუპ,*
მუნაფაშ გურს ზღვარზღვალანს,
გვალას რცხიმალ ცხიმურეფს
ჭვემა ელასხარსხალანს.
იკიონტუ ტყას მაფა
უგამაგათ, არგამათ,
ელაჯინე მუნაფას,
იშოლუ დო რაყვალანს.
მიკახორცქუ ჯაშე ჯას,
იშო _ გვალას, აშო _ ტყას,
ვაუტორხუ დუდს ვარა,
გურს გოლოფა ობარბანჯ.
ახავაია, თიშ ცოდა,
ქუფაფუაფ ყოროფას,
მაზმა სერ დო გოთანას
იწირღოლ დო იწანწალ.
ნაყოროფას ივარანს,
ნაჭვემურსი ჭაბაკანს,
ელაჯინე მუნაფას
მინ უკურთხანს, მინ ხვამანს.
გურს ნაბარბანჯ გოლოფას
ქოუფალუ გვიმარას,
სო ატყობუდ ყოროფას,
ნამუ გვალას, ნამუ ტყას.
იკიონტუ ტყაშ მაფა,
გილეფაფუ არგამათ,
ტყურათ ირჯებ დო გორუნს
ოლაფარეს ყოროფაშ.
ცას მუნაფა ელასხუპ,
ჭვემა მუშის სხარსხალანს,
ობარბანჯუ მაფაშ გურს,
იძიცანსი გვიმარა.

 
ბუბუთარიღი: შაბათი, 12.09.2009, 15:40 | შეტყობინება # 5
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ივეტა წითაშვილი
* * *
მინდორ ცუნდელ,
გვალა თილ,
ცა ნაჭვემა,
ნირს ფაჩილ,
შარა ულათ
შულადირ,
დაჩხირ ყებურს
დორძამილ,
ყანწი ღვინით
შუმაფილ,
გურ ყოროფათ
წყუნაფილ,
ტყვია თოფის
მორხინილ,
ჭყორ ნაფურნა
ვაჭოფილ,
ცურუ ჯას ჟი
ჭირნაფილ,
ბუძგურიეფ ჯას
ცუმილ,
ხინჯი ბოგას
გოდგუმილ,
ოშ ნაულა,
ოშშა ნწყვილ,
აკნარღვეფი
აკონწყილ,
ოფულარი
ვაფულირ,
სიტყვაშ რთაფა
კვარკვანტი,
იშო-აშო
კვარკვანწი,
ნახარებუ
ხიოლი,
გოთანაში
ციორი,
მუმულეფიშ
ყიონი,
დადულეფიშ
ფიორი,
ოშშა ჰამო
რაგადი,
ოშშა ჭვახეთ
კვარწახი,
ავრე ათორჩქინაფა,
ევრე ღირთაფ-რცქინაფა,
დღა-სერიში ჭუებულ
ვაიწუე, მუს გიფულ,
ტყურათ გოპუნქ
გუმართუქ,
მა ვავორექ
დუმართუ.
შარა ბოგას აკორე
ნირს გოთანას აწაფაფ
მუთუნ კოჩის ვაჭოფე
ჭყორ ფურინელ აკაშა.

***
ხე ვამოფთხა გოპირე,
ყვინთელ, კაბაჭარჭულერ,
კისერ ყირტალ, ტანი სკვამ,
ჯღარ ფურცელით ხარხუნტელ.
ოყვავილეს ყვავილეფს,
ქაცუეფით დორშვილეფს,
აკუნწყუმნა ანდანერ
ყოფირელ – ვაყოფირელ.
_ მუ უნკუნჭაფ რენია
უგურე დო უშურე.
ყურმულო უჯინედეს
ზუკოლუნდეს, წონენდეს,
ბორიაქ წასაგებელქ,
ვამოხვარელქ, ვანტირელქ,
ქიმწაფაჩუ ყვავილეფ
ნატრებულ – ონატრებელ,
აკობანძღუ აკოსოფ
ხარებულ – ოხარებელ,
მითაჟამიშ ნაჩიებ
ქიმთარაყუ ოტყალეს: _
ხე ვამოფთხაშ მეთხუმა
მუთუნნერო ვაშინერს!
ქარ-ბორიაქ ვედეჯერ,
მუქ იყუა თექ თეფერქ,
ტანს ოშფათ ქიგაკვამანჭ
გოპირელს-ვაგოპირელს.
ჭარაშა მის ეწარნე,
მის ულინუ უშარეთ?
ქარ-ბორია ყოროფათ მოჭონკე დო
დუდს ქიჭყენდ.
ენა, მუქ შემერყუა,
რჩქინებულ-ურჩქინებელქ.
ირო ართნერო ვარე,
მინ ჩხანა რე, მინჩა ჭვენს,
ქარ-ბორია სოდგარენ
გვალაშ იშო დოხინწე.
ხე ვამოფთხა ობაღეს
ხე უნკუნჭაფ ქეშარედ,
თაში ყოფე, თაში რე,
მუთ ვაშინერს!
ვაშინერს.

* * *
ფსუაჭითა ფარფალია,
ელაღოზელ ღაჟურია,
მიკაფურნანდ კამელიაშ
მინ ართ ყვავილს, მინ მაჟიას.
სი სარალო ფარფალია,
მის რე გალაყაფუქია?
ართ დღაშ რინა გაფუნია
ღორონთშე ჭყოლოფირია,
გური ჯგირო ქოუჩია,
დღა მალას ისერუნია.
ჩე ყვავილეფ კამელიას
ტანსი გახცხანტალუნია,
ჩილამურეფ ძიაცალო
მინ ასკუ მინ უცენსია.
არძა ართი ვარენია,
შხვა რენია კამელია,
უფერუანს ფარფალია,
მის ართ ღვანწკის, მინ მაჟიას,
ჩილამურეფს უსკირუანს
უყოროფეთ სო ულია,
ართიანიშ ვორეთია,
ღურელით დო თელითია,
უყოროფეთ თე ქიანა
ჩქიმო რე ლიებურია.
გეგკასერუ ფარფალია
ვეგეგონე რაგადია!
მუ ფქიმინა, მიყორსია,
ვამნარღენქი მუთუნსია,
ყოროფათი ართ დღაშ რინა,
თაში ხოლო ღირუნია!

 
ბუბუთარიღი: შაბათი, 12.09.2009, 15:41 | შეტყობინება # 6
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ბათლომე სართანია

*ახალწანაში მიოხვამური.

ახალწანას მიგახვამანთ,–
ბრელი ახალწანას ,
ტანს სინთელე რშებუდანი,
სახანათი დო ჭყანა.
ჯგირი გური ერყუნაფუდან
ირი ჩე გოთანა,
,,ვიხარმამას" იბირდათ დო
სხაპდათ განდაგანას!..
წყარ(ი) დო ჰავა ზომიერი,
ჩხაპალი დო ჩხანა,
ირო გინოშვაშვალერი
თქვან(ი) ორტვინ(ი) დო ყვანა.
ხვე დო ბერექეთიანი
მაღაზა დო ხარა...
ბაღეფ ეფშა, მარან(ი)ეფშა,
შხურ დო თხათ–ამხარა,
ოქართე ცხენეფით დო
ორინჯით აგვარა...
ულიუ გილეგვარგვასუნი,
ლექსერი – აგვართა...
ორქო – ვარჩხილითი ეფშა
თქვან(ი ) ლაგუჯ(ი) დო ხარა,
ბოშ(ი) დო ცირა თოლიგვირა
ახალი აკნაკათა,–
ფსქეიფით ეფშაფედანი
კეღუცა დო მართა
,,ჩვენ მშვიდობას" იბირდას

*რინა
კოჩქ ვაგოზურდა, ხანდა დო ლ/მათ
რინას დაღალი თია–საღალე,
სქან(ი) რინას შხვაშის ვაუძინანა
მუსხიშახ ეშე ვა დუმაღალე...
ართშა ერჩქინდი, ართშა ღურუქუ,
ქიჰამ(ი) ღურაშა ირფელიშ გემო,
თე ცხოვრებაშა ირკოც უკათ/,
აბა ქიანა ართიში რენო?!
ღურაშ უკული მეტ(ი) რინა ვა რე,
ეცად(ი) თაქ ორდე გიმოთ რინელი,
თევრენ დორთელი თაქ კოც ვაუძირ,
ვართ თაურე ულირ(ი,) თექი შინელი,
კუნტა ცხოვრება– წვალებათ ეფშა,
დრო გ/წონტებულ(ი) ვა მიჭირინე,
თოლეფც ვაშაყუნდას ოშქათ ჩხვინდინი,
თოლეფ ოთოლეს ვადინტ/რინე.
ათეშენი რე ირო ლ/მარე,
დო ცხოვრება რე დიდ(ი) ზღვა დურუმი,
მინ(ი) „პოპკაცალო“ ჟი მინიფაფუ,
გიმე ინჭყუ ქუა ყურუმი...
ზღვაქ ვადოსქირას ქუაქ ვანდღულას,
ათაშ(ი) იყუაფ(უ) ნირზება რკინი,
უბადო შურიში წ/რდეს ოჩხუპუ,
ჯვეშშე მოძუნა ნირზება – წყინი.
ათაშ(ი) ირთუუ ჩქ/ნი ცხოვრება,
კოჩ(ი) დო ეშმაკი რინას მართენა,
არძას ობაღ/ ათე ქიანა,
მარა ართიანც ნებას ვარზენა!..

*მუ საჭიროდ თე სიცოცხლე
მუ საჭიროდ ცა დო დიხა, ონირზე დო ოლიმური?
მუ საჭიროდ თე სიცოცხლე, ხან კუნტა დო დღა დალური?
კოჩქ გორჩქინდუნ, უკულირე, ირფელს გებუ ხაჯალური,
ქიანა რდუკო უკოჩეთ, კოც მუთუნქუ ვაბაღუნი!
კოჩ ტალიკეთ იბადებუ, დო ტარკალეთ ღურუ კინი!
ერჩქინა დო ღურაშქას/, წვალება დო გასაჭირი,
დაბადება სავალდებო, ღურა ვარე გასაკვირი;
მითინს მუთუნ ვაუკათუ, ბუნებარე ჩილათირი!
თე ბუნებაქ სოლე მორთუ, უხურგე დო უძგალეთ/
ეშმაკიში ოფუტე დო, უხორცე დო უძვალეთ?
დიხა გონორაზილო დო, ჟინი ორთა უკარეთ?
ღურა ფარათ ოყიდე დო, ჟინი ორთა უფარეთ?
კოჩქ მუ მეჩუ ქიანას/, რჩუალადო ჭყვიდაშ მეტი?
ირ სიავეშ მედუდალე – კოჩი ეშმაკიში კეში.
ინა ირფელ ზაკვილირე, მინათხუმა კოჩიშ ხეში;
მუ იყიდუ კოჩ– ვარდუკო, დო ქიანა ფართას თეში?!
მუ თასირე ათე კოჩი, მირე თეში დამბადებუ?
კოჩი მუჭოთ მაყურყანი, თელ ქიანას კისერს გებუ!
კოჩქ სიცოცხლე აწვალასი, ათე წესი წილო რგებუ;
ვადოღურას შარა ვარე, თაქ დასქიდუ მუნაგებუ.
თე სიცოცხლე მის აფუდუ, საჭირო დო სახიოლე?
სიცოცხლეს ვადაბაღ/, ზღვა დო გვალაქ მელე–მოლე!
სიცოცხლე დო ღურა ნირზენს, აბა, დაბოლება სორე?
ნირზი ვარდას, ყოროფა რდას, თე ქიანა სო იგორე?
ბჟა დო თუთაქ ანათუკო, მურიცხეფქ/ იჭკვაჭკუკო,
ზღვა, წყარი დო ოკეანექ, კალაპოტის იქვანთუკო,
თაშ უჯგუდუ ბუნებაქ/, მუს გემოშა დიკვანწუკო;
მუში ბედნიერი კართე, ტყა–ურუმსუ იფართხუკო!

მიში ინჭას ეიობეს, თესხი ზღვა დო ოკეანე?
დო ზღვა დურუმს ინოხენი, ნამ შონიში ნანთხორალე!
თეზმა დიხა, თეზმა გვალა,ნოტე მისი ნაგორალე?
ურემი თეში მანთირალი, ვარა მიში ნათოლარე?!
მიქ მოუნტუ თაკარი ბჟას, ონტუ–იჭუ–ზანთალანს?
დაჩხირს უნჭირინუანს, გიმე დიხა წკვაფანას,
წყარ დო დიხას ქუმონტებუ, თუდო დუღა გვარგვალანს;
თუთა გოფშა, ბჟა– თაკარი, მიქ მოხაზუ კვარკვალას?
მირე თეცალ მედაჩხირე, ვარა მირე თეცალ ჭკადუ?
ბჟაში ქურა აკეთუდო, ცა მურიცხით გინოჭკადუ?
ჟი ცა ქუდო გიორთუდო, დიხა ჩაფლათ კუჩხის მადუ;
ვართ ეშმაკიშ, ვართ მენცარიშ, ვართ კოჩის ხეს ენა ვაგუ!
თე ქიანა უკოჩეთ, გემო იყიდ სანატრელი!
ტყა–ფარონს/ ცხოვრენდუკო, ნონტყელეფი ბრელშაბრელი.
ნადირეფს/ ქუღუდუკო, თე ქიანა ქუჩუჩელი:
კოჩი ვაგორჩქინედუკო, ინა ღორონთიში ჭყელი?

*კოლექტივიზაცია
კოლექტივი საშუალება,–
ღარიბეფიშ მარსხებელი,
მოხანდეფიშ სასარგებლო,
ნტერიშ დამამარცხებელი.
გომორძგვილო ყოფედას
თეში დამაარსებელი,
გოხვამლაფირი მოხანდეფი
თიში დამაფასებელი!..
საუჯგუშოთ მუჭო ვა რე,
ართო იმუფშუათუნი,
ჯიმალობა მიღუდანი,
ართიან იფუფჩუათუნი?
ვარა ფარა მუშოთ გოკო
კიდობანც ფჩუათუნი?
ხიხილერი აგაფას
ხოჯეფ ათუვსქუათუნი?..
ვა უჯგუნო ტრაქტორით
დიხა მუნოგორთინუათ,
ქუალეფი გუვორღვათ,
ფერდის მივორგინუათ,
ჯვეშოიან ცოდილება
იშო მიკოდინუათ?

 
ბუბუთარიღი: შაბათი, 12.09.2009, 15:43 | შეტყობინება # 7
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ბათლომე სართანია
*ჩაიში კულტურა
მუსხი ორქო დო ფარა
ჯვეშო მიშუ გრანიცაშა,
ნიკოლოზი უგუნურცუ
ეცალი ვემკუეჩანდ ყაშა
ფიქრენდეს, ჩაი მის ხერენდ
ხვათახვალე ჩინეთის
ჩქინ ქიანას მი მერჩანდ
ე კულტურაშ ბილეთის?
ამდღა ჩაი მის ვა უჩქ,
ჩქინი კუნთხუ, ჩქინი განც
კაკლარონი გეგნოჭვარეს,
მილიონ ჰექტარც ჩაი ჩანც.
მოხანდეს თე კულტურა
სიმდიდრეს მოუღანც.
ჰე ბრიგადა, კოლმეურნე
ჩაის ჯგირო მუკუულე,
ღარიბიქ მიწიკინი,
შელებუანც გუწუულე?..

*კვარკვანტია
კვარკვანტია ტანი ქექე
თელო ორქოში კაკალი,
ნამ(უ) ბაღ/ს/ ინოჩანც/,
თქვანიცალი ტატალი.
ხურხიჩელა, თოლიგვირა,
ნერ–ფერი წყორილი,
ბროლიშ(ი) კიბირი მეჭუდათ,
ართიანც მეწკ/რწკოლირი...
დეჯერი კოჩი ცოდა ორე
მაძირაფუ თეცალიში, –
კ/დ/რ(ი) ოთანთალაია,
მეგვანაფილ(ი) ჩხეშაში:
თუმა ოშიალაია,
ყვა გიღუნა ფიჩალი,
თელ სიცოცხლეში ფასი ღირ,
თქვან სხეულიში მირცხალი.
ეშმაკურო ვა გამგანი,
მითინქ ვაგმაფიჩხანი,
ქობწანდანი ართიანი,
ეგებ ღორონთქ მირსხანი!

*რკინაშ ხოჯი
გოფუშინი, რკინაშ ხოჯი,
სი ვაგიკო ჭადო ფურჩა,
სქან ბარბალიშ კიბირეფც
ჯიმალობას მივოფუჩა.
რაშა რერა ვორერა,
სი ჩქიმ რკინაშ მოზვერა.
აკოფხონათ სანძღვარეფი
ჯვეშ ბორჯიში აკნახურგა,
ხანდაშ ქართას გაკიბკათათ
რკინაშ ბუსქაქ, ყაზაყ–მუშაქ.
რაშა რერა ვორერა,
უჯგუშ ვამაგორენა.
თასო მოფსპათ კულაკეფი,
ვავაჰამათ შხვაში ფურჩხა,
გეგნოხონი უტახ დიხა,
გეიორღვი ჯიკიშ ჩხვინჩხვა!
რასა რერა ვორერა,
ხანდა ვადმაღორენა.
შურო მუთას მოხვარუნა,
გორდა ცხენიშ ენაბურცხა,
მოხანდეფც თოლც ურძღანცუ
სქან ბარბალიშ გინაბურსა.
რაშა რერა ვორერა
ხანდა ვადმაღორენა.
გოქვარქვაშელ მინდორეფი
გიჯინენა, გელუნა,
კოლექტივიშ მოხანდეფი
სქან მოხვარას ელუნა.
ხიო, რერა, ორერა,
სი ჩქიმ რკინაშ მოზვერა.
ადრე თსის ქინკორღვანთ
სქან ხვეიან ნახონას,
ართინერო გინუუსვათ
ნახურგა დო ნანთხორას.
რაშა რერა ვორერა,
სი ჩქიმ რკინაშ მოზვერა.
ვინტეფც ჯგირო მოუნჭირი,
ფთხილას, ნტერეფ ვაგუნას,
შარას ვეჩვერცხიებუთ
სქან ბორბალიშ ნაგორას.
ირხიალი, გიგობირა
რაშა რერა ვორერას.

*ჩიტი, ქორშ/ნო?
ჩიტი ქორშ/ნო, მა სქანი ქირი,
ეკოთხოზინით სი ქეკაშირი,
სი გომირჩქინი თიცალი ჭირი,
მუთუ გინიბღი, ოხ, გასაკვირი!
ითამ ფიფრქენდი, მაფუდი ჭოფილი,
კაკალი ფსუა გაფუ სოფილი,
სი ჩქიმ(ი) ცოდათ მიკოქოსილი.
უჩა ბედით, გაფუქ მოსილი!..
იმენდი მიღუ, ხოლო გელუქუ,
გურიში მალამათ ირო გელუქუ,
დო ჰა, თეზმას ქ/გოფერუქუ,
სი ჩქიმი გურცუ უჩათ ნწერ/ნქ!..
დით/რე ნერი, ქომუჩი გური,
მოშქვიდუანც/ ჩხე ჩილამური,
ვარა მაღირსი სამარეს ლური,
ქოთქვი, საბოლათ მუ გილამუნი?!

*ჭითა ჯარი
ჭითა ჯარი–უშიშარი,
ჭითა ჯარი–ნაცაცხალი
ტერც ვამართე სანძღვარიშა,
გერზ გენია ნაცანხალი.
სადარაჯოს გეურეთ
გიმათუთაში ნაშიბუს,
შხვას ვემდუღა, ტერც ვარზე,
სესერეკაშ ართ(ი) ტკუს,
ვაშა ჭითა არმიას,
სოციალიზმიში დარაჯეფც!..

*ხარხიში გენია
,,ირკოჩ(ი) ფიქრენც, მუ ორთ/ნი
შხვა კოჩიში უჯგუში/“
–მუგოშინანთ ერკებულო,
მის–მი მუთუ უჯგუნ თის/.
ართგან კათა ვაწუხენც/,
დუდ(ი) მეუღუ დიდი ჭკვერო,
ირო ქვარას ალაჯინე,
ქააფუნო ვანი რძღელო;
საქიანო ეიონწყ/მ(უ);
დუც(უ) მეუძ/ ორთუმელო;
გოკურცხუნ, თქუანც ,,–მიბგია,
ართი კვალა, ართი ლელო!..“
მაჟრა ფა რე ნულიშ გიმე,
ხანგეფი დო ლენჩეფიში,
ხაკუცეფი, ხირმიშთეფი
აბრაგი დო ქენჩეფიში.
ათე ფა ოგვაჯე რე,
ირინერი შერეფიში.
მასმა ფა რე ჟი ნორმა,
დიდი უღუ ასა–გასა,
ოკითხუო თის გეუხე,
თელქიანა, თელი მასა.
თე ჟი ნორმა გენია რე,
თელქიანაშ(ი) მარსხებელი,
მარა თენაუფონდიკეს
ვაუჩქ, მირე მარგებელი;
შხვა უჭკუეთ მიოჩქ/ დო
თვითონ ვა რე სარგებელი.
ნული ნორმა სიბუგე რე
ორსიმინანც ხვათაფალო,–
სადილი დო საკაკალო,
ათენეფი ზეშ–კეკი რე,
მაჯინე რე ზეფირიში,
ჟირპიჯალას გეგაფილი,
იშო–აშო ფეფინიში.
ვაგეგებუ მერთელეფი,
ბოროტი დო კეთილიში,
ვართ(ი) ურაშა მიოთინანც,
ვართ(ი) მინჯე რე ხენდილიში.
გენია ურას დოხენდ/ნც,
ბუგა ხენდილც ონტინუანც,
ბუგა შარას გილას/ნც/,
გენია შარას გოწურუანც,
ბუგაშ გური ჰოდია რე
გენია პოპორც გონჩურუანც

 
ბუბუთარიღი: შაბათი, 12.09.2009, 15:48 | შეტყობინება # 8
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ალიო ქობალია

*დადი სინთუანიში

დადი, სინთე ქუმოძირი,
ვენმოქოსა გარამემს,
აფხაშ რხვილქუ ქიგმაწკურუ,
გილვოგაგა წკვარამემს.
კურუმემსუ ვემიოხე
მენცარეფიშ ნაჭარეფი,
ყურუმულო გეგნოსქველე
მითაჟამიშ ნაჭარეფი.
ქარ-ბორიას ქოთხოზაფუ
ნაშილუა ნოსეფეფი,
იშო დიხას ქიმთოფულე
ოხვამე დო ნოგეფეფი.
არძა ართო გამკოცუმე
ჭკარჭკუნტია მურიცხეფი,
მებდინაფუ თუთაშ გურ დო
მუში ჩელა ოროეფი.
სო ვორექ დო სოლე იბდა,.
დინაფასუ მევორექ,
ვესინთორუ უსქანეთუ
სოფელიში მუორექ.

*ცარ-მეცარე
დიასქურიშ ეშნაველს,
ორქო უცენს კირიბემს,
თუთა გარე ეშალემს,
ბორჯეფიში კიბირელს.
მენჭაფილი ომუნეს,
თუთაშეფიშ ორეკე
უსინთუანს უკუმეფს
ნაწყარუა ურეკეს.
აფხარხვილი მეცარე
გირინუანს ოროემს,
სილირ ორქომელანემს
ორგილუანს ორეემს.
მიშესოფუ, მიორე
ურთა-ორთაშ ფულირემს,
მეორიე-მიორელს,
მასქურეფიშ ფიორემს.
ტომბა სერიშ დალიერს,
მოგოთანე, კიაპელს,
გეგნირულე თუთაშ თე
ზღვაში წვანე ნიარემს

*აია რიელიში
ერია რე, მორია რე.
თუთაშფერი ბორია რე,
ზღვა ორიუ ოდიარეს,
ფორილიე ფურიალე.
მაფაშ ხორი-ხორიალე,
ხორგონი დო ხალია რე,
ორქოყილო ხვიარელსუ
ხაიაში ხოლუა რე.
გინულასუ მიორენი,
მადინაფუ მედია რე,
მონიარე მიარენი –
უთურეფი მეფიარე.
ერია რე, მორია რე,
გილეფაფუ მორიალე,
ზღვასუ კოკო გელაფირი
აფსირტე დო აია რე.

*მენიშოლი
ათე ნიში მიში რდას, ზღვაში ეკნაყოთემი,
ბორბოლიაშ ნამოსას მითუტყობუ ნოთენი,
მუჟამიში ფარონემს ნარდიე დო ნოგეფი,
სონი ბორიეფიში უსოფუანდ ნოდეფი?
ქოძირუო ნასისმარუ მაფა-ბჟაში ნოხვენი,
უკულ ბორჯემს ყუნაფილი, უკიანოს ნოზღვენი...
მურე მიკიფიორუნი, ცასუ მიკოქოსელი,
მენიშოლიშ შური რენ დო ერქემიში ნოსეფი?..

*ბინეხისუ ქუდვოყაშა...
ბინეხისუ ქუდვოყაშა,
ეშე გეშვაყუნუქუ,
ცასუთ ქიგიბჯინექუ დო
ნერჩის ვედვეთხიებუქ.
თუთაშ იშო გიბგორუა
ჯვეშეფიში ხონარემს,
კათაფილი იყუაფუ
ჟინი ცაში ბორიემს.
მურიცხემსუ ქუსინთუა
ნასერუა წკვარამებს,
თუთაშ ფერსუ ქუხოლუა
ნაჩერუა ლაწკარემს.
...ბინეხისუ ქუდვყაშა,
ეშე გეშვაყუნუქუ,
ცასუთ ქიგიბჯინექუ დო
ნერჩის ვედვეთხიებუქ.

*გესერელს
კირიბია წინიკელს
გიოხანტანდ მურიცხემს,
მენცარული წინიგეფი
მითუტყობუდ ფსუალემს.
აკა ქიგმაგორედას,
მიშეფსოფუქ სიზმარემს.
,,მებდინაო გესერელს?” –
მევორექუ თუთაშემს.

 
ბუბუთარიღი: შაბათი, 12.09.2009, 15:49 | შეტყობინება # 9
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ლეონტი ცირამუა.

*მაყალე ცირაში ალბომი

გიძღვნენთ მა ათე ვარდენც
მაყალურო გოსაშინეთ;
გეგნოფაჩ/ნთ, ქაშაჯინეთ,
ხათე ხოლო ქიგაშინეთ.
თე ნაჭარას ქოძირ/ნთი
წეკითხენდათ, გიძიცანდათ,
თქვანი სქვამი თოლი დო წარც
ხეირიანო გინაქვანდათ.
ეთი ბორჯის სოდგა ვორდე
მუდგა დაფიქრებულონი,
მათი ტანი ქომიგინანც,
იყით ხიოლებურონი.
დო ფიქრეფი მუდგაფერი
მიღუდასი, გ/მაფანტუ
დო ეთი დროს თქვანი სახე
მა წოხოლე დიმახანტუ.

*ასტრონომიული ოცნებას ყუნაფილი.

ხე გომიტეთ დო მიჯინით,
ასე ცაშა მეფუბრინ/ნქ;
საჰაერო ქიდიბტე დო
ეთერონას მიბუბრინ/ნქ.
მიბჭურჭინ/ქ ირიათო,
ცაშა ქიმურქ, ბჯინებულე,
მარა ოლ/ ირო ყოფე,
თესი ხოლო ბჩინებულე.
ოქიანეს ხურგი ვარე,
ჩქიმი დუდი, ს/ მუ გოკო?
... ათე ორთას, მუ ირთანცი,
სალამ/ს/ გებგე მოკო.

*ონჯუა
ონჯუა რე, სარკილი დო,
ბჟა ალალ/ს გერინელი,
იქაქალ რგილი ბორია,
ორთაძალაშ გორჩქინელი.
ხობწყარი პიც, გვალაშ თუდო,
გევოხექ/ დიდი ქუას;
დუდი ხეშა გილამიძ/
დო უჯინექ წყარიშ ულას.
წყარი ტკილენც გინმობურსუნც,
გინმიჭუმინ გინალაფუს,
ქუას წყარჩიტი გეწიანც,
წყარი ტობას ინემაფუნც.
მოლე ოროს ქიგლურინ დო
მელე ზესქვი ქიმკიფაჩალ,
რგილი მასქურქ ქ/დირქიუ,
წვანე დელო ქიგვაჩალ.
ჯაში ფურცელენც მასქური
სქვამას ქუფარფალუანც
დო ფურცელენც გეყონილი
კოლენც ქაჭ/რჭინუანც.
ბჟაქ ალელ დო გელერუმ
რობააკანქ, ორუეფით
მარა ცააქ/ გიჭვაჭუტუ
სქვამი, ჭითა მურუცხეფით.
ვამკურთ/მუ ბრელი ხანც დო
თუთაქ ხოლო გელესარკალ
დო თიშ სქვამი ჩხორიაქ/
ტყას ვარჩხილ/ ქიმშაკანკალ.
მა ორთაში სისქვამეს/
გვალო ქაბობრებუდი,
წიგნი ქ/დომიდვალ/ დო
თუთას ქიმებჩემებუდი.

 
ბუბუთარიღი: შაბათი, 12.09.2009, 15:50 | შეტყობინება # 10
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ლაშა გვასალია

*ოგურეში
ჩქიმ ჯინჯიშა მეyონილემქ
ქუდომჭყეს ჩალუა,
მარა მუსუ დუმარკენც,
გერც ცუცქეფიშ ლალუა…
მუჟამსირდ უჯინჯეთ-
ჯაშ ნოyელა ფალუნდუნჲ,
ვარა ყამა ჩუალირო
ვარკალანდ დო ვალუნდუნჲ…

*დობშურდი
დობშურდი-გიჯინექ ჭვიტეშე,
მოკო სქანჲ წორო გილეფშე…
ცაშე გეგმოზღვინდა თოლეფც-
მოკო საცოდება ბღოლე…
დღალეფც აშვოკირა ონწეს,
მასქურც გითვოტყობა მონწეს,
ყებურს ვუფურუა შურც,
ღორონც კონ უთხილა შხურც…
მოლა, მუნაფაშა მოლა,
თაქ რინჲ გინორთუმე ჭკოლა,
ღურუ საფულეშჲ კარც ჯგორუ,
მოლა, თუთაშ ომპას ბგორუ…
დობშურდჲ,
იფცქვირინა ჭვიტეშე…
ბორჯრე ცაშჲ ოხვამეს გოლეფშე…

*ჩხანა
ჩხანა, ჩხანა ბარჩხალია ჩხანა,
სქან ოროშე ელნაფალა თუთას,
ქეყოროფუ ჩქიმ სერქ დო ვათხუ,
ცაშჲ სქუალეფც-ჯეგეთას და ურთას…
ვადმათხინუ, სისმარებით ბჭყოლუნც,
მუშო მოკოდ თეშჲ კიკინჲ დო ჯინა,
ნანა მუჭო ვამარტინუ თეშე,
მუჭო გამმწარ yოროფა დო რინა…
ჩხანა. ჩხანა, ჩხორთოლია ჩხანა,
ქუწი მუთუნ უონჯღორე თუთას,
მუ იyი ღორონთქ თე ქიანაშჲ სქიბუს,
თეშჲ უმოშო უჯინას დო ურთას?!
ჩხანა, ჩხანა თოლუნჭაფუ ჩხანა,
ვადომტუა თუთაწკუმა ხვალე

 
ბუბუთარიღი: შაბათი, 12.09.2009, 15:51 | შეტყობინება # 11
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
ლია ნაროუშვილი

*სამარგალოს
სამარგალო- გურიშ კილა,
ღორონთიში კართეშ ორო,
ღურჭულანა მარგალეფი,
ჯიმალეფიწკუმა - წორო.
ჩქიმი სქვამი სამარგალო,
ოხვამურ ჯაშ ელნარდირე,
გაფურინანც მაფშალია-
ოშ ხონარშა ელმაბირე.
ვოი ნანა გოლუაფირო,
სქანი მანგი მითინ ვარე;
მა ვორექ, ჭიჭე ჭყიში,
მასქურწკუმა მიდგუ კარე.
სქან სანთელო სქან გოლუა,
სამარგალო, ჩქიმი რინა,
მა ვამაკო, მა ვამოკო,
უსქანეთ წუმოძინა.
სამარგალო-გურიშ კილა,
ღორონთიში კართეშ ორო,
ღურჭულანა მარგალეფი,
ჯუმალეფიწკუმა - წორო.

*ჯინჯი ხატი

სამარგალო - ჯინჯი ხატი ჩქიმი,
თოლც ვა მოთხუ დღაშ დო სერით მა,
თაქ რე ჩქიმი გიორგი დო ცოტნე,
სქან სანთელო სქანი გოლუა.
მოსიზმარუ, გეთუ ქიანაშ ხანქ,
ვამმოსვანჯუ გურიშ ჭუაქ მა,
მაფშალიეფ ღურჭულანა ცას,
სქან სანთელო, სქანი გოლუა.
სამარგალო, ოდაბადე ჩქიმი,
თოლიშ სინთე, ბორჯი გოთანა,
ერძამილი მურიცხეფ დო თუთა,
სქან სანთელო, სქანი გოლუა.
კონსტანტინეშ ნაკილოთა ბაღის,
დობრგათ ხოლო საარკვანო ჯა,
სამარგალო - ჯინჯიხატი ჩქიმი,
სქან სანთელო, სქანი გოლუა

 
ბუბუთარიღი: შაბათი, 12.09.2009, 19:16 | შეტყობინება # 12
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
გური ოტობაია-ჭეჭეთობა

ჭიჭიკელა, მერეკელა, ინტელა,

თე რინა რე მინ ღურა დო მინ-თელა,

გერნელ ვორექ ორინაფილ შარას დო,

ნტერიშ ჯინშე არქა ვედიყვინთელა!

ჭიჭიკელა, მერეკელა, ინტელა,

ტატიჩხია, ტატურელი, ტატალი,

ყებურს ღუმუს ქუდუჭყაფუ ჭვარტალი,

დიდაშ ხეეფს უჯინენა მარდუეფ,

ბინ შარაშა ბრელ რე გიოჭვართალი,

ტატიჩხია, ტატურელი, ტატალი,

ოფოფორე, ფოფორია, ფაფარუ,

კინოხონიშ ნერჩი მოთაქ გაფარუ,

სოთინ მუთუნ ვეძირებე ოხორსუ,

აბრაგიშ დო გერიშ გიონთხაფარუ,

ოფოფორე, ფოფორია, ფაფარუ,

კიკორია, კიკოდემი, კოკორო.

ქიდოიტესო მაღაზეფი ხოკორო?

გინორთექო თუნთიშ დირთხიშ

მანგურო?

გინორთექო ტოჯეფრო დო ნოყორო?

კიკორია, კიკოდემი, კოკორო,

შიბა რენი, იშიმბორი, იშიმბე,

ჯგირ დო სქვამითჩილი გიგმოხიშიმბე,

მუჟამს იინ ქეკახატა კვიჭინხეს,

მუჟამს იინ ეგებ ძალამს დიდშიმბე,

შიბა რენი, იშიბორი, იშიმბე

 
ბუბუთარიღი: შაბათი, 12.09.2009, 19:19 | შეტყობინება # 13
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
გური ოტობაია-ჯარშა ვაზარენთ უკლაშ ჯიმას

ჰავას ნახვილეფ ვამკასოფ თოკშე,

კიროკილ თუმას წყარ გეწენს დოქშე,

ეფურნელ ჩეჯას ვარკუ მეჯინა,

მარა უსქვამაშ ბონილ რე ჯიმა.

ჭუმე ქუდოცენს ორქოშფერ თუმა,

ჭუმე იჸუაფ ნატრიშ ერთუმა-

დობადონაშო გვალო დო ფალო!

ჩეჯაშ უსქვამაშ ბონილ რე ჯიმა.

დორზამილ ბუხარც აფუ ართ ამბე,

ალდაჩხირ ცხვინშა გეშაჭვართაფე,

ეფურნელ ჩეჯას ვარკუ მეჯინა,

მარა უსქვამაშ ბონილ რე ჯიმა.

 
ბუბუთარიღი: შაბათი, 12.09.2009, 19:21 | შეტყობინება # 14
admin
ჯგუფი: ადმინისტრატორები
შეტყობინებები: 105
რეპუტაცია: -2
სტატუსი: Offline
გური ოტობაია-მაფშალია

ჩქიმ ქიანაშ მაფშალია,
შხვა ქიანაშა ვაფურინა,
გოლუაფირო,უსქანეთუ
გეწკურილი მაფუ რინა.
სქან ოგვაჯეშ ხეშქაგური,
ჩილამურით მაფუ ეფშა,
სქანი ართი ბირაშენი
თე შურს ხოლო ღურუს მეფჩა.
საქორთუოშ ცე ქიცა რე
თე გოთანა ხვარჩალია,
შხვაშ ქიანაშა ვაფურინა,
ჩქიმ ქიანაშ მაფშალია.
გონწყი ფსუა დო კისერი,
თუთაშფერი ქუმოძირი,
არძა ჩქიმდა,არძა ჩქიმდა,
სქან ჭუა დო სქანი ჭირი.
უღურჭულე წკონდა ღალეფს,
წვირალ თხუმ დო მაბჟალიას,
შხვაშ ქიანაშა ვაფურინა,
ჩქიმ ქიანაშ მაფშალია.

 
ფორუმი » Test category » მეგრელების ფორუმი » მარგალურ პოეზია
გვერდი 1 დან1
ძებნა:

Copyright MyCorp © 2017ჰოსტერი uCoz